Mat 19 | NAS | STEP | Teketa tenang Jiisuuꞌke tee aung karananka minku bakevura Kaaleliꞌnameng sipura Judiaꞌnavoraꞌaape pareꞌaruꞌ Jooꞌdani-nari-koo amenkaꞌkoonooꞌ.

Matthew 19

Nampeesi Totoꞌkoo Jiisuuꞌ Niaꞌauꞌnaꞌ

(Mak 10:1-12; Luk 16:18)

1 Teketa tenang Jiisuuꞌke tee aung karananka minku bakevura Kaaleliꞌnameng sipura Judiaꞌnavoraꞌaape pareꞌaruꞌ Jooꞌdani-nari-koo amenkaꞌkoonooꞌ. 2 Eeꞌnoko nantoong karingai Jiisuuꞌ siompai teꞌ napoꞌ berouꞌ, eeꞌnoko teka taare-antavuruꞌ teing. 3 Eeꞌnoko niiꞌning boto keperuuꞌnavitu nariꞌ Jiisuuꞌanko pororaiꞌnange aavavaama aaꞌpauꞌ, “Botoi ee tauraꞌpui otong naninge baꞌaang bataꞌkoo baka piavoma deekoꞌ?” 4 Jiisuuꞌke makuꞌurima aaꞌpuruꞌ teing, “Diiꞌke ee deeruerima tasiꞌperiaung tee Kumponinge pupuꞌuuꞌnang donkaani eeꞌnoko manikuma nariꞌ nkovuretuꞌnaꞌ? 5 Eeꞌnoko aaꞌpui otong Daari Meekung-koo,

‘Teeꞌkoo donkaanie baumararing sipureta baꞌaang ninka pinkaꞌareaing, eeꞌnoko tee tenaanka narung mono deempareaing.’
(Pupuꞌ 2:24)

6 Enang tee, kenaanka deempareaꞌ teka narung deemparesing. Teeꞌkoo kapooꞌ Kumponinge beꞌnuꞌantavuuꞌnung naroꞌka naninge tankaampuaukaꞌnung.”

7 Eeꞌnoko teinge niaꞌaama napoꞌ aaꞌpauꞌ, “Teka Moosesie aming-koo tauraꞌpuma aaꞌpuuꞌ,

‘Naninge baꞌaang sipuma deekoꞌ narung karavoto~ daarivuaing nampeesi totoꞌpuing tasiꞌanta-koo?’”
(Boto 24:1-4)

8 Teketa Jiisuuꞌke makuꞌurima aaꞌpuuꞌ, “Moosesie teeꞌ tauraꞌpuuꞌnooꞌ diiꞌankaampi siꞌkoo tee diiꞌ diikaang domang ivekaꞌdoriko, teka pupuꞌaruꞌnooꞌke Kumponinge teeꞌ minkuvuaꞌ. 9 Teka eeꞌ naurampimang ninge, baa tee naning baꞌaange tutung kaukauro nkovuaruko bataꞌura eeꞌnoko oovunani nampura deekoꞌ teie nampeesi orarivumaung.”

10 Teketa bakaning barevare-nupoonge aaꞌpauꞌ tee, “Ei, bakei naning baꞌaang ninka teeꞌ nariꞌ daiꞌaresi otoremaatoaing deekoꞌ nantoong nampeesiariaꞌ otoaing-koo tampaꞌ.” 11 Teketa Jiisuuꞌke makuꞌuma aaꞌpuruꞌ, “Teeꞌ minkuerimatomanaꞌ ookara nantoonge arooꞌaavarupeuꞌ, teing naing Kumponinge teeꞌ otoꞌkoo miruꞌurimaing deekoꞌ teeꞌ otoropeuꞌ. 12 Aaꞌnomaung-koo: niiꞌning makosiaavaing keꞌde-ita pontoꞌarikooꞌ, eeꞌnoko niiꞌning nantoonge deekoꞌ tuukavaarikooꞌ, eeꞌnoko niiꞌning maroita nampeesi-koo piavoroarukooꞌ muuꞌ paninung narung-koo keiꞌorooꞌnaang. Baa naning teeꞌ otoꞌkoo arooꞌaravaing tee makosi teeꞌ otoaing.”

Toirekaaꞌ Jiisuuꞌanko Tavoꞌaaruꞌnaꞌ

(Mak 10:13-16; Luk 18:15-17)

13 Teketa toirekaaꞌ okiꞌnarekaꞌ Jiisuuꞌanko tavoꞌaaruꞌ Jiisuuꞌke bireng panteꞌurira kunsivuriiꞌnaang teing. Teka teinge bakaning barevare-nupoonge poteaarikoꞌ teing tavoꞌaaruꞌning. 14 Eeꞌnoko Jiisuuꞌke aaꞌpuuꞌ, “Teing toirekaaꞌ tauraꞌperereriko poroai ning-anko, paraꞌereriaꞌ, aiꞌ tee muuꞌ paninung nantoong amuriiꞌ okovuriaing.” 15 Teketa tenang bireng panteꞌurira teing-koo teketa tenkenuuꞌ.

Narung Nemaka Barevarenku Mmauꞌ Otoꞌevukoꞌnung

(Mak 10:17-31; Luk 18:18-30)

16 Enang tee teketa naning narung Jiisuuꞌanko pora niaꞌuma aaꞌpuuꞌ, “Nau-anta, aming kapooꞌ tampara ninge nkoamira tee domaang oparavaukaꞌnung kompampaing?” 17 Jiisuuꞌke makuꞌuma aaꞌpuuꞌ tee, “Dake aming-koo ning kapooꞌ tampara nkovepeuꞌnung-koo niaꞌmemaang? Aiꞌ Kumponing narung masikung tampara otong. Daꞌ tee domaang oparavaung-koo tuntaraaꞌnaang piarora deekoꞌ dake tee bakaang botonanka siompeaing.” 18 Teie aaꞌpuuꞌ, “Boto areing?” Eeꞌnoko Jiisuuꞌke makuꞌuma aaꞌpuuꞌ, “Aing eeꞌ oroꞌ botonanka:

19 ‘Naning dupisiꞌeaukaꞌ,
Nampeesi orarieaukaꞌ,
Bakiaaꞌ nkoveaukaꞌ,
Daang-koo tuutunampeaukaꞌ,
Daumararing deto noruꞌeresi pakuereaing,’
(Toro 20:12-16)

eeꞌnoko

‘Dake tee naning daꞌkoo dueꞌnung daka piaararamanaꞌ nariꞌ teeꞌ piaaveaing.’”
(Boontu 19:18)

20 Eeꞌnoko teie nemakai aaꞌpuuꞌ, “Aing ookara teroita tanatavantuꞌning, aiꞌ aming kapooꞌ ninge mmeꞌ nkoampaꞌ?” 21 Jiisuuꞌke makuꞌuma aaꞌpuuꞌ tee, “Dake ookara dupe-anta-koo piarora deekoꞌ bera kapooꞌnanka dakaning ookara baavevera mooniꞌ nkavera ataꞌoiꞌnuka-koo tankaampeaing. Teeꞌ nkovera Paning-koong kavonanka otoꞌderuaing. Eeꞌnoko ning siomei poai.”

22 Eeꞌnoko teie nemakai teeꞌ taaravura teketa orarunsiari tenkenuuꞌ tee kavokavoro mmauꞌpoꞌnung deemparako. 23 Jiisuuꞌke teeꞌ oovura bakaning barevare-nupoong nauvurima aaꞌpuruꞌ, “Ninge masikaꞌ naurampimang diiꞌ, tee naning kapooꞌ mmauꞌpoꞌnung bakei poreꞌ masikung teꞌ muuꞌ paninung-koo tung-koo. 24 Eeꞌnoko napoꞌ unampansi naurampiiꞌnaang, kaameliꞌnavoroꞌ bamaruꞌkoong busie tumparavarupeuꞌnaꞌ bakei naning kavonanka-poꞌnung dau basinooꞌ makotuaꞌ Kumponing bakaang muuꞌkoo tung-koo.”

25 Eeꞌnoko tenang teinge bakaning barevare-nupoonge teeꞌ minkuvuko taaravaara bakei aaꞌnaꞌ taꞌninauꞌ. Eeꞌnoko aaꞌpauꞌ, “Nka enang baa domaang mooꞌaravaing?” 26 Eeꞌnoko Jiisuuꞌke teing oovurira aaꞌpuruꞌ, “Nantoong biiꞌka domaang mooꞌkoo makosi deeaꞌ, Kumponinge deekoꞌ ookara kapooꞌ nko-koo makosi.” 27 Teketa Piitai baariꞌuma aaꞌpuuꞌ, “Aung ee, teka niiꞌke ookara kapooꞌnanka niikaning sipampiruꞌnung daꞌ siontampima, eeꞌnoko niiꞌke aming nkavampiaing?” 28 Jiisuuꞌke makuꞌurima napoꞌ aaꞌpuruꞌ teing, “Ninge masikaꞌ naurampimang, tenang ookara kapooꞌ nerakaꞌparavainang, ning Tee Naning-naumpoꞌ Paning-etaing teke nkanooꞌ baꞌnavaꞌnaniꞌdomai ovorimari baꞌnanampainang paninung meenasie baumaritaaꞌ, teeꞌ nariꞌ napoꞌ diiꞌ kante baꞌnantariri kara simpeꞌerimaatoaing teing kivora-ita kenaanka muuꞌ Isireeli-nupoong-koo ovontuntariri. 29 Eeꞌnoko ookara nantoonge aing aaꞌning nkaang miring pankaing-anta-koo sipauꞌning: pavananka, biumaraang, biurukaaꞌ toireꞌ, niiꞌnooꞌ biikaang kansiꞌ, teinge tee daakuꞌnamuꞌpie makuꞌ nkavaavaing eeꞌnoko napoꞌ tee barenku domaang oparavaung-koong okovuriaing teing. 30 Teka mmauꞌ nantoong ureai otoromaing damaꞌke damaꞌduariaing, eeꞌnoko damaꞌduariri otoromaing ureaavai.”